Դեպի վեր

Հաշտարարության ինստիտուտի ներդրմամբ դատարանները կաշխատեն նվազ ծանրաբեռնվածությամբ. Արսեն Մկրտչյան

21/08/2015

 ՀՀ արդարադատության նախարարի առաջին տեղակալ, նախարարի ժամանակավոր պաշտոնակատար Արսեն Մկրտչյանն այսօր ՀՀ ԱՆ «Իրավաբանական ինստիտուտ» ՊՈԱԿ-ում հանդիպել է հաշտարարի որակավորման դասընթացին մասնակցած անձանց, ներկայացրել Հայաստանում հաշտարարի ինստիտուտի զարգացման հեռանկարները և այլ երկրներում արդեն իսկ ներդրված համակարգի փորձն ու դրա արդյունավետությունը:

 Նախարարի ժամանակավոր պաշտոնակատար Արսեն Մկրտչյանը, անդրադառնալով Հայաստանում առաջին անգամ ներդրվող այս ինստիտուտին, նշել է, որ մեր երկրում արդեն ունենք այն մթնոլորտը, որ բոլոր կողմերը ձգտում են վեճն ավարտել հաշտությամբ:

 «Բայց կան շատ վեճեր, որոնք թե՛ արհեստածին են, և թե՛ կողմերի շփման տեսանկյունից խնդրահարույց: Հենց այդ տեսակի վեճերն են, որոնց լուծման համար անհրաժեշտ է հաշտարարի միջամտությունը»,- ասել է Արսեն Մկրտչյանը: Նրա խոսքով՝ այս ինստիտուտի արդյունավետ գործարկման համար ներդրվել են բոլոր մեխանիզմները, որոնց արդյունքում համակարգը կկայանա, և  բավական մեծաքանակ վեճեր կավարտվեն հաշտությամբ:

 «Դրա հաշվին կշահեն բոլորը. թե՛ կողմերը, և թե՛ պետությունը կունենան էական տնտեսումներ, իսկ դատարանները կաշխատեն նվազ ծանրաբեռնվածությամբ»,- ասել է Արսեն Մկրտչյանը՝ ներկաներին ցանկանալով առաջիկա քննությանը հաջող մասնակցություն, իսկ հաշտարարի աշխատանքում՝ անկողմնակալություն:

 Հիշեցնենք, որ Արդարադատության նախարարությունում օգոստոսի 11-ից մեկնարկած հաշտարարի որակավորման դասընթացին  մասնակցած 60-ից ավելի քաղաքացու ներկայացվել էին ՀՀ ընտանեկան, աշխատանքային, քաղաքացիական օրենսդրությունը, հաշտարարության գործընթացի կազմակերպումն ու անցկացումը, գործերի կառավարման հմտությունները, կոնֆլիկտների կառավարման ձևերը,  հաշտարարության գործընթացում հանդիպող առարկությունների հետ տարվող աշխատանքները, ընտանեկան վեճերի հետ կապված հաշտարարության գործընթացի առանձնահատկությունները և այլն:

 Հաշտարարի որակավորման դասընթացներն իրականացվել են ՀՀ ԱՆ «Իրավաբանական ինստիտուտ» ՊՈԱԿ-ի և «Վեճերի արդյունավետ լուծման կենտրոն» անգլիական ընկերության հետ համատեղ՝ «Հայաստանի արդարադատության համակարգի անկախության, պրոֆեսիոնալիզմի և հաշվետվողականության ամրապնդումը» Եվրոպական միության և Եվրոպայի խորհրդի համատեղ ծրագրի աջակցությամբ:  

Քննարկել
Վերադառնալ նախորդ էջ
Նախարարություն Գործառույթներ Գրադարան Տեղեկատվական կենտրոն Ընդունելություն

Բաժանորդագրություն