Դեպի վեր

Կայացավ շարժական գույքի նկատմամբ ապահովված իրավունքի գրանցման էլեկտրոնային միասնական կառավարման ծրագրի շնորհանդեսը

25/09/2015

 ՀՀ նոտարական պալատում Հայաստանի Հանրապետության արդարադատության նախարարի առաջին տեղակալ Արսեն Մկրտչյանի մասնակցությամբ այսօր տեղի է ունեցել շարժական գույքի նկատմամբ ապահովված իրավունքների գրանցման գործակալության էլեկտրոնային միասնական կառավարման ծրագրի շնորհանդեսը: Միջոցառմանը մասնակցել են նաև Համաշխարհային բանկի, USAID-ի, Մեյսիս ինֆորմեյշն սիսթեմս ընկերության, բանկերի և վարկային կազմակերպությունների ներկայացուցիչները:

 Արդարադատության նախարարի առաջին տեղակալ Արսեն Մկրտչյանի խոսքով՝ վերջին տարիներին Հայաստանի Հանրապետության կառավարությունը նախաձեռնել և իրականացնում է մի շարք բարեփոխումներ, որոնք միտված են բարենպաստ տնտեսական միջավայրի ձևավորմանը, ներդրումների խրախուսմանը, փոքր և միջին ձեռնարկությունների համար վարկերի հասանելիության դյուրացմանը:

 «Իրականացվող այդ բարեփոխումների արդյունքում էլ ներդրվեց նաև ապահովված իրավունքների գրանցման համակարգը: Աշխարհում կիրառված այս համակարգը դյուրացնում է գրավի և այլ ապահովված իրավունքների առարկա հանդիսացող  շարժական գույքի օգտագործումը: Դրանք հատկապես օգտակար են փոքր և միջին ձեռնարկությունների վարկային կարիքների համար, որոնք չունեն անշարժ գույք՝ որպես գրավի առարկա օգտագործելու համար»,- ասել է Արսեն Մկրտչյանը:

 2014 թվականի դեկտեմբերի 17-ին Հայաստանի Հանրապետության Ազգային ժողովի կողմից ընդունվել է «Շարժական գույքի նկատմամբ ապահովված իրավունքների գրանցման մասին» ՀՀ օրենքը, որի համաձայն ստեղծվել է մեկ միասնական առցանց գրանցամատյան, որը տեղեկատվություն է պարունակելու գրանցված ապահովված իրավունքների մասին:

 Շնորհանդեսի բանախոսները համակարծիք էին, որ այս նոր համակարգի ներդնումը շահեկան պայմաններ է ստեղծելու հատկապես փոքր և միջին ձեռնարկությունների համար՝ առավել հասանելի դարձնելով նրանց համար վարկային միջոցների տրամադրումը՝ դրանով իսկ խթանելով բիզնես միջավայրի զարգացումը:

 Համաշխարհային բանկի և USAID-ի ներկայացուցիչները բարձր են գնահատել ՀՀ արդարադատության նախարարության կողմից Հայաստանում գործարար միջավայրի բարելավման ուղղությամբ ներդրած ջանքերը: Արսեն Մկրտչյանն էլ իր հերթին շնորհակալություն է հայտնել միջազգային գործընկերներին օրենսդրական բարեփոխումների և ծրագրային լուծումների հարցում գործուն աջակցութայուն ցուցաբերելու համար:

 Հաշվի առնելով, որ սպասարկման գրասենյակների ստեղծումը պետության համար կառաջացներ լրացուցիչ ֆինանսական բեռ՝  սպասարկման գրասենյակի գործառույթներն իրականացնելու են նոտարները: Այդ նպատակով Հայաստանի Հանրապետության արդարադատության նախարարությունը, ԱՄՆ ՄԶԳ «Ֆինանսներ տնտեսական զարգացման համար» (USAID FED) ծրագրի կողմից ցուցաբերված տեխնիկական աջակցության և ֆինանսավորման շրջանակներում, սեպտեմբերի 19-ին անցկացրել է ապահովված իրավունքի գրանցման համակարգի ներդրմանը նվիրված վերապատրաստման դասընթաց, որին մասնակցել են նոտարների ավելի քան 30 օգնականներ: Դասընթացները լինելու են շարունակական. առաջիկայում USAID FED ծրագրի կողմից ցուցաբերված տեխնիկական աջակցության և ֆինանսավորման շրջանակներում նախատեսվում են նման դասընթացներ կազմակերպել նաև Հայաստանի Հանրապետությունում գործող նոտարների, բանկերի և վարկային կազմակերպությունների իրավաբանների, ինչպես նաև վարկային և ռիսկերի կառավարման մասնագետների համար: 

Քննարկել
Վերադառնալ նախորդ էջ
Նախարարություն Գործառույթներ Գրադարան Տեղեկատվական կենտրոն Ընդունելություն

Բաժանորդագրություն